發新話題
打印

[比賽作品發佈] [ MOC - S Villa (previously Box iN) ]

[ MOC - S Villa (previously Box iN) ]

好幸運今年第一次參加呢個動漫節 HKACG 2015 Lego 比賽,而入到十強位置!對我黎講去到呢步已經好開心喇!今次比賽主題為理想家居,有好多朋友仔都立即將自己想要既野都塞入去一個空間中,但係空間既安排又如何呢?呢樣反而係我既入圍作品想表達既野。呢度我就分享下我呢個作品,可能同其他人好唔同,或者佢係唯一可以真正係現實起到出黎既「理想家居」啦!

家,最緊要係一個可以係放工後辛苦後脫離現實既地方,但家可以唔係一個密閉室內空間 indoor space,而係一個密閉既室外空間 inner outdoor space。今次呢座樓既焦點就係中間既庭園,而所有房間都跟住佢打轉,令每一個房都可以睇到個花園。我一貫習慣,畫左草圖先...











空間既安排都有心思。客廳為中心所以放於中間,對正花園。再入係飯廰,升高左既地台就可以 define 到呢個食野既空間。飯枱部份向出伸延,就可以食飯時欣賞到花園。另一邊就通往車房同客廁,咁朋友們就唔洗走上樓去洗手間喇。









上面係私人地方,先上一層係個人 studio 加私人影院,因為如果你有留意,大廳係無電視機,所以焦點一定會去左個花園。再上就係主人房同廁所,亦通到去一個半開放既陽台位置。最後,廁所旁既樓梯會通往天台,有一個小小既泳池,我另一半鍾意游水,就可以週末或放工後運動一下。







如果大家專心睇,通往其他層樓既樓梯都係最近街道,而最需要安靜既飯廳同主人房都係最入。呢個 circulation space 就可以隔開呢啲房間,遠離最嘈雜既地方。樓梯唔用層層叠既方式,就可以增加空間感,好似變成一個獨立房咁樣。





顏色方面亦都有少少特別既概念。曾經有一位朋友同我講灰色呢類顏色好難用,其實呢度正正係我想表達既野。建築物本身可以只係黑白灰,咁就可以將注意力放係線條同埋整體形狀。我地既生活同人生先係色彩既來源,所以裏面既生活家品同細節有顏色,仲要好豐富!






車房靜悄悄咁係大黑盒 (studio) 下面,佢係唯一唔係平行於座樓既空間,斜斜插入建築物,為立面 facade 增加左少少變化。佢隔離有個小小既工具房,可以放下雜物同修車。少少縮入一幅牆就可以做到一個有蓋既車房,連住後門,就可以唔洗濕身上車。而大家可能都見到建築物右側有幅牆向出凸出,咁樣兩側就可以變成窗,俾陽光進人樓梯位同埋主人房既衣櫃旁,而同時間係建築物既外觀設計上有少少變化。



S Villa 係我同老婆既新居,名字都代表左我地兩個人個名。原先改名為 Box iN 係想 focus 係中間既花園,亦即座樓既重心。建築物唔需要誇張,而係微妙既線條變化當中可以同樣 functional,先係建築設計既精神所在。希望大家鍾意!




本帖最近評分記錄
  • JackaL 人仔倉資產 +5 精彩作品 2016-1-9 13:53
  • tc_forward 人仔倉資產 +5 精彩作品 2015-8-5 12:27
  • tong3182 人仔倉資產 +5 精彩作品 2015-8-2 23:20
  • HOSIKYEUNG 人仔倉資產 +5 精彩作品 2015-7-31 17:27
  • Alywin 人仔倉資產 +5 精彩作品 2015-7-30 23:35
www.theAngelworld.net

TOP

設計得好有心思!

TOP

Thanks!
www.theAngelworld.net

TOP

好正! 我好鍾意

TOP

great create~

TOP

發新話題